"Artıq 2-ci ildir ki, çempionat fərqli reqlamentlə keçirilir. Görünən odur ki, bu format şahmatçılar üçün də idman mübarizəsinin gərginliyi və marağı baxımından olduqca uyğundur".
Prosport.Az xəbər verir ki, bu sözləri Azərbaycan Şahmat Federasiyasının prezidenti Mahir Məmmədov jurnalistlərə açıqlamasında deyib.
Yarışa marağın yüksək səviyyədə olduğunu bildirən federasiya prezidenti əlavə edib: "Bu da formatın uğurlu olduğunu göstərir. Bunu eksperiment adlandırmaq düzgün olmaz. Artıq bu sistem tətbiq olunur və düşünürəm ki, davamlı olacaq. Gələcəkdə mükafat fondunun artırılması da mümkündür və istərdik ki, bölgələrdə yaşayan azarkeşlər də bu atmosferi daha yaxından hiss edə bilsinlər".
Çempionatda maraqlı nəticələrin qeydə alındığını diqqətə çatdıran Mahir Məmmədov deyib: “Hər şey idman prinsipləri və ədalət çərçivəsində baş verdi. Məhəmməd Muradlı artıq 2 dəfə Azərbaycan çempionu olmuşdu və bu il 3-cü dəfə bu titulu qazandı. Çoxları Şəhriyar Məmmədyarovun yenidən çempion olacağını gözləyirdi. O, uzun illər əvvəl 2 dəfə bu ada layiq görülmüşdü və 22 ildən sonra bunu təkrarlamaq istəyirdi. Lakin bu dəfə də finalda məğlub oldu. Qadınların yarışında da maraqlı mübarizə izlədik. Ülviyyə Fətəliyeva ötən il, səhv etmirəmsə, 1/4 və ya yarımfinal mərhələsində mübarizəni dayandırmalı olanda çox gərgin hisslər yaşamışdı. Həmin anlarda federasiyanın bəzi üzvləri onu sakitləşdirməyə çalışırdı. Bu dəfə isə vəziyyət fərqli idi. Ayan Allahverdiyeva da çox ləyaqətli və yüksək səviyyədə oyun nümayiş etdirdi. Şahmatda hər şey bir anda dəyişə bilir. Bu görüşdə də vəziyyət 180 dərəcə dəyişdi və partiyanın axarı tamamilə fərqli istiqamət aldı. Şahmatda play-off sistemi özünəməxsus dinamika yaradır. Hətta tay-brek mərhələsinin olması yarışa əlavə həyəcan qatır. Bəzən təsadüfi məqamlar da olur, amma ümumilikdə bu format çox maraqlı və baxımlıdır. Yaranan ajiotaj isə bizim üçün çox müsbət və sevindirici amildir".
FIDE vitse-prezidenti də olan Mahir Məmmədov qadınların yarışında Türka Məmmədyarova ilə Ayan Allahverdiyeva arasında olan görüşlə bağlı verilən hakim qərarı ilə bağlı Prosport.Az-ın sualını da cavablandırıb: "Türkanın hərəkəti alqışlanmalıdır. Ona ilk görüşdə qələbə verilmişdi. Daha sonra apellyasiya onun razılaşması ilə qərarı heç-heçəyə dəyişdi. FIDE-də feyr-pley mükafatı kimi Svetozar Qliqoriç mükafatı var. Onun və Rauf Məmmədovun hərəkətinə görə bu mükafata adlarını namizəd kimi verəcəyik".