"Qarabağ" yayda 2 mərkəz müdafiəçisi alacaq.

Prosport.Az sportinfo.az-a istinadən xəbər verir ki, Qurban Qurbanov komanda üzvləri ilə görüşündə atacağı addım barədə onları məlumatlandırıb. O, adları açıqlamasa da, hazırda bir neçə legionerlə bağlı araşdırma apardığını bildirib.

Qurbanovun narahatlığı tam təbiidir. Çempionlar Liqasının pley-off mərhələsi çərçivəsində “Nyukasl” ilə keçirilən oyunun 22-ci dəqiqəsində zədələnərək əvəzlənən Bəhlul Mustafazadə mövsümü qapadıb.

Tibbi müayinələrin nəticəsinə əsasən, onun sol budunun adduktor əzələlərində və qasıq nahiyəsində zədə müəyyən edilib.

Hazırda tibbi heyət tərəfindən cərrahi müdaxilənin mümkünlüyü qiymətləndirilir. Onun məşq prosesinə qayıdış müddəti bərpa mərhələsinin gedişinə uyğun olaraq fərdi şəkildə müəyyənləşdiriləcək.

İlkin tibbi rəyə əsasən, reabilitasiya dövrünün təxminən 10-12 həftə davam edəcəyi gözlənilir. Bu da o deməkdir ki, Mustafazadə üçün sezon artıq başa çatıb.

Ümumiyyətlə, "Qarabağ" Çempionlar Liqasında kifayət qədər qol buraxıb. Uzağa getmədən, "Liverpul" və "Nyukasl"la görüşləri xatırlamaq kifayətdir. "Köhlən atlar" son 2 matçda qapısında ümumilikdə 12 qol görüb.