"Azarkeşlərimizə təşəkkür edirəm. Məğlub olanda da komandanın yanında olurlar. Növbəti matçlarda daha yaxşı oynayıb, onların etimadını doğrultmağa çalışacağıq. Oyuna gəldikdə isə ilk hissədə planlaşdırdıqlarımızı reallaşdıra bilmədik. Bəlkə də çempionatda ən ucuz qolları biz buraxırıq. Bu, adamı məyus edir. Daha ciddi və məsuliyyətli olmalıyıq".
Prosport.Az xəbər verir ki, bu sözləri Azərbaycan Premyer Liqasının XX turunun “Kəpəz” – “Neftçi” görüşündən sonra keçirilmiş mətbuat konfransında qonaq komandanın baş məşqçisi Azər Bağırov deyib.
Mütəxəssis jurnalistlərin suallarını da cavablandırıb.
– Buraxılan qollarda qapıçının nə dərəcədə səhvləri var? Növbəti matçlarda Məmməd Hüseynova şans verməyi düşünürsünüz?
– Hər oyundan əvvəl məşqçilərlə həyət barədə məsləhətləşirik. Xüsusən də qapıçı məşqçisi ilə. Əlbəttə ki, bu gün Yusif İmanovun səhvləri var idi. Daha çox məsuliyyətli olmalıdır. "Turan Tovuz"la oyunda da bir səhvi olmuşdu. Hamısını təhlil edirik. Ölçü götürüləcək.
– Yuri Vernidubla xeyli söhbət etdiniz. Nə barədə danışırdınız?
– Ukraynalı keçmiş məşqçi var. Onun haqda söhbət etdik. Mən də ona "xoş gəldin" dedim.
– Ryonosuke Ohori "Neftçi" ilə oyunlarda meydanda olmayıb. Bunun səbəbi nədir?
– Gözündə bir az problem var idi. Qərar verdik ki, bu gün dincəlsin. 4 gün əvvəl Bakıda həkimdə olub. İstəsəniz, kağızları da göstərə bilərəm.
– Rəhbərliyin komandaya dəstəyini hiss edirsiniz?
– Heç bir problemimiz yoxdur. Klub üzərinə götürdüyü öhdəlikləri yerinə yetirir. Deyə bilmərəm ki, nəyimizsə çatışmır. Hər şey qaydasındadır.
– Qışda niyə az transfer etdiniz?
– Jefersonun getməyi bizə böyük zərbə oldu. Rüsumu bilirsiniz. Legioneri 3 aylıq götürüb klubu riskə sala bilmərik. "Kəpəz" Premyer Liqadan düşməyəcək. Öz gücümüzü nəzərə alıb transferlər etdik. Kim "Kəpəz"dən hər oyunda xallar gözləyirsə, mənim o adama suallarım var. Bu gün çətindir. "Neftçi" ilə "Kəpəz"in imkanları eynidir? Bəlkə "Sabah"la? Legionerə 250 min verib çempionatda qalacaqsansa, pulları yalandan xərcləmək düzgün deyil. Riskdir. Oyunçu gəlib zədələnə bilər. Jeferson qalsaydı, bir vinger transfer etməyi düşünürdük. Jefersonun gedişi başa düşə bilmədiyimiz situasiya idi. Belə şeyə rast gəlməmişəm. Vitor Feyjeo dedi ki, həyat yoldaşım hamilədir. Övladı burada dünyaya gətirə bilməz. Feyjeoya icazə verdik. Jeferson da icazə istəsəydi, ona da veriləcəkdik. O qədər beyni qarışıq futbolçu idi ki, icazəsiz çıxıb getdi və klubu pis vəziyyətdə qoydu. Klubun ona borcu yoxdur. Bütün bonusları verilib.