"Kolambus Kru" klubuna keçən Azərbaycan millisinin futbolçusu Nəriman Axundzadənin 2 həftədən sonra ABŞ-yə yollanacağı gözlənilir.

Prosport.Az xəbər verir ki, bu barədə report-a 21 yaşlı hücumçu ilə əməkdaşlıq edən futbol agenti Tural Əsgərov açıqlama verib.

O, forvardın viza işləri tamamlanan kimi sözügedən ölkəyə gedəcəyini söyləyib: "Bu proses təxminən 2 həftə çəkəcək. Nərimanla 2 ildən çoxdur ki, işləyirik. ABŞ klubuna transferində də yaxından iştirak etmişəm. "Kolambus Kru" ilə danışıqlar 1 ay davam edib".

Tural Əsgərov yığma üzvünün daha məşhur komandaya keçmək perspektivi barədə isə bunları söyləyib: "Ümumiyyətlə, belə proqnozlar verməyi xoşlamıram. Bu bəzi məsələlərdən asılıdır. Gələcəkdə çox şey ola bilər. Necə olacağını birlikdə görəcəyik".

Xatırladaq ki, Nəriman Axundzadənin "Kolambus Kru" ilə sözləşməsinin müddəti 2029-cu ilin yayınadək nəzərdə tutulub. ABŞ təmsilçisi futbolçu üçün "Qarabağ"a 1,2 milyon avro ödəniş edəcək.