Azərbaycanlı futbolçu Nazim Məmmədzadə Maldiv adaları çempionu olub.

Prosport.Az xəbər verir ki, 25 yaşlı yarımmüdafiəçinin şərəfini qoruduğu "Maziya" klubu son turda ən yaxın izləyicisi "Odi"ni məğlub edərək tarixində 6-cı dəfə ölkə çempionatının qalibi olub.

"Neftçi" yetirməsi olan Nazim ötən ilin sonlarında bu komandaya qoşulmuşdu. Futbol səyyahlarından olan Məmmədzadənin Maldiv adalarına qədər yolu bir çox ölkədən keçib. O, ilk peşəkar müqaviləsinin Şimali Makedoniyanın "Renovo" klubu ilə bağlayıb. Daha sonra legioner həyatını İspaniyada davam etdirən oyunçu burada aşağı liqa təmsilçiləri "Moralo" və "Marino Luanko"nun formasını geyinib. Bir müddət Vətənə dönərək MOİK-də çıxış edən Nazim daha sonra Latviyada "Qrobina", Polşada "Flota", Qırğızıstanda isə "Alay" klubunun uğurları üçün çalışıb. "Maziya"ya da məhz Oş təmsilçisindən keçib.

Nazim Məmmədzadə Maldiv adalarıda top qovmuş yeganə azərbaycanlı futbolçu deyil. Daha əvvəl Elməddin Məmmədov da bu turizm ölkəsində oynayıb. Ampluaca qapıçı olan Məmmədov 4 il əvvəl "TC Sports Club"un çərçivəsini qoruyub. Elməddinin də maraqlı karyera yolu var. O, Qırğızıstan ("Alqa Bişkek", "Muras Yunayted"), Gürcüstan ("Tsxinvali"), Malta ("Sent Andryus"), qondarma Krım Respublikası ("Yalta"), Bosniya-Herseqovina ("Yedinstvo") və Albaniyada ("Luftetari" və "Poqradaçi") məharətini sərgiləyib.