“Qarabağ”ın polşalı qapıçısı Mateuş Koxalski qış fasiləsində ölkəsindən təklif alıb.

Prosport.Az xəbər verir ki, bu barədə 26 yaşlı qolkiper Polşa mətbuatına müsahibəsində deyib.

O, hətta “Vidzev” klubundan gələn təklifə razılıq verdiyini bildirib: “Təsdiqləyə bilərəm ki, təklif var idi və mən qarşı tərəfə "hə" demişdim. Əvvəllər də dediyim kimi, Bakıda idman baxımından yaxşı nəticələr əldə edirəm. Özümü inkişaf etdirdiyimi və Çempionlar Liqasında oynadığımı hiss edirəm. Bura uğur qazanmaq üçün mükəmməl yerdir. Amma heç kimin bilmədiyi bir şey var, çünki bu barədə danışmamışam. Məşqdən və ya matçdan sonra evə qayıdanda tək qalıram. Sevdiklərimdən uzaqdayam. Futbol mənim üçün çox vacibdir, bu, aydındır. Amma ailəm və sevdiklərim həmişə mənim üçün prioritet olub və olacaq. Nişanlım indi daha tez-tez yanımda olur, amma Polşaya qayıdanda yenə hər şeyin öhdəsindən təkbaşına gəlmək məcburiyyətində qalıram. Bu isə mənə çətindir. Ümid edirəm ki, insanlar bunu başa düşərlər. Mən ailə adamıyam və bu cür ayrılıq psixoloji cəhətdən pis təsir edir. Buna görə də “Vidzev”in təklifini qəbul etmişdim”.

Mateuş Koxalski “Qarabağ”ın bu transferə icazə vermədiyini söyləyib: "Klub rəhbərliyi razı olmadığı üçün heç nə alınmadı. Elə oldu ki, ehtiyat qapıçı zədələndi və yeni qolkiperin qeydiyyatında problemlər yarandı. Mən komanda üçün o qədər vacib oyunçuyam ki, "Qarabağ" “Vidzev”in təklifini rədd etdi. Bunu başa düşürəm və artıq bu barədə düşünmürəm. “Vidzev” başqa qapıçı ilə müqavilə imzaladı və hər şey bitdi”.

Təcrübəli qapıçı Almaniyanın “Borussiya” (Dortmund) klubundan təklif alması ilə bağlı yayılan iddialıları isə təkzib edib: “Borussiya”dan heç bir təklif yox idi. Amma xəbərləri oxumuşdum. Son bir neçə həftə ərzində haqqımda yayılan transfer məlumatlarının 90 faizi yalandır”.