Futbol üzrə Premyer Liqanın debütantı "İmişli" klubu "Turan Tovuz"un legionerinə elçi düşüb.

Prosport.Az-ın xəbərinə görə, klub "Sportinq" və "Benfika"nın yetirməsi olmuş David Tavarişi heyətinə qatmaq istəyir.

İmişli klubu Kabo Verde əsilli hücumameyilli mərkəz yarımmüdafiəçisini icarəyə götürmək niyyətindədir. 26 yaşlı futbolçu yayda "Turan Tovuz"a keçsə də, zədə alıb və cəmi 1 matçda çıxış edib. Ötən ay Premyer Liqanın "Sumqayıt"la matçında (2:1) portuqaliyalı futbolçu cəmi 2 dəqiqə meydanda olub.

Lakin tərəflər keçiddə razılığa gələ bilmir. "İmişli" futbolçunun maaşı yüksək olduğundan, onun əməkhaqqısının bir hissəsini "Turan Tovuz"un ödəməsini istəyir. Qarşı tərəf isə buna razı deyil.

Ancaq bu transfer baş tutmasa belə, "İmişli" heyətinə 19 yaşlı kolumbiyalı cəlb edib. Bu, Xuan Faxardodur. 19 yaşlı, tam adı Xuan Sebastian Faxardo Ernandes olan futbolçu yarımmüdafiəçidir və ötən ay "İmişli"də baxışda olub, yeganə bəyənilən legionerdir. Onun son klubu Kolumbiyada "Marakaneyros" olub.

Lakin bu futbolçu əsas heyət üçün sifariş olunmayacaq. O daha çox növbəti mövsüm üçün nəzərdə tutulub.