Azərbaycan Premyer Liqasının XIX turunun “Sumqayıt” – “Zirə” oyunundan (2:3) sonra qonaq komandanın baş məşqçisi Rəşad Sadıqov jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bildirib.

– Baxımlı oyunun şahidi olduq. 2-ci hissədə daha üstün oynadıq. Fasiləyə bir top üstünlüyü ilə getdik. 2-ci hissədə də yaxşı oynadıq. Rəqibin sonlara yaxın təhlükəli epizodları da oldu. Vacib qələbə qazandıq. Futbolçuları göstərdikləri oyuna görə təşəkkür edirəm.

– Fasilədə futbolçularla nə danışdınız?
– Fasilədə onu danışdıq ki, 2-ci hissəyə fəal başlayaq. Kubok oyununda 2 fərqli hissə olmuşdu. Bilirdik ki, “Sumqayıt”ın hücum gücü yaxşıdır. 2-ci hissənin ilk dəqiqələri bizim üçün çətin keçdi. Buraxdığımız qol xeyrimizə oldu. Bundan sonra daha fəal oynadıq. Kombinasiyalarımız olurdu, amma qol vura bilmirdik. İstədiyimiz qol 89-da gəldi.

– Uzun müddət idi qələbə qazana bilmirdiniz. Bu gün seriyanı bitirdiniz. Qələbə üçün xarakter lazımdır, ya ustalıq?
– Qələbə üçün bütün komponentlərdə yaxşı olmalısan, ən yaxşısını etməlisən. İstər bu gün, istərsə də kubok oyununda, yaxşı oynamışdıq, futbolçulardan razı qalmışdım. Bu gün də çətin olacağını bilirdik. Nə qədər belə oyunlar olsa, çempionatımız daha maraqlı olar.

– Bu oyundan sonra kubokda şansları necə dəyərləndirirsiniz?
– Kubokda hər şey 0-dan olacaq. “Sumqayıt”ın gücünü bilirik və nədəsə üstün olduğumuzu demək olmur. Çalışacağıq ki, oyuna qədər zədəlilərimiz tam sağalsın. Hər itki komandaya təsir edir. Məsələn, bu gün “Sumqayıt”ın da itkiləri var idi. Onlar da olsaydı, bizə daha çətin olardı.

– “Neftçi” ilə matçdan sonra bildirmişdiniz ki, mövsümün 2-ci hissəsi çətin olacaq. Bu çətinliyə qarşı hansısa ehtiyat variant hazırlamısınız?
– Komandamızın müəyyən strategiyası var. Fərqli oyunçularla da komandanı gücləndirmək istərdik. Amma əlimizdə olan futbolçulardan razıyam. Bəzən zamana ehtiyac olur ki, potensiallarını açsınlar. Çalışırıq ki, imkanlarımızın ən yaxşısını edək.

– Transfer dönəmini bağlamısınız? Bu heyət avrokuboklara vəsiqə üçün kifayət edəcək?
– Ən yaxşı variantımız futbolçularımızın ideal formada olması, zədələrin, itkilərin azlığıdır. Bəlkə, alınsa, bir futbolçu ilə güclənərik. Maksimum bir transfer ola bilər. İndiki məqamda ən yaxşı silahımız futbolçuların yaxşı formada olmasıdır.

– Mövqeyi nədir?
– Hücumda oynayır. Həm vinger, həm də hücumçu kimi çıxış edir.