Azərbaycan millisinin və “Qarabağ”ın oyunçusu Bəhlul Mustafazadənin “Şençjen Penq Siti”yə keçməkdən imtina etməsinin səbəbi bəlli olub. Müdafiəçi Ağdam klubuna görə çinlilərlə danışıqları dayandırıb.

Prosport.Az futbolinfo.az-a istinadən xəbər verir ki, dünən tərəflər maliyyə məsələlərində bütün detalları razılaşdırıb. 2+1 illik müqavilənin imzalanmasına bir şərt mane olub.

Belə ki, Çin klubu futbolçunun dərhal komandaya qoşulmasını, təlim-məşq toplanışına qatılmasını istəyib. Mustafazadə isə məhz bu amilə görə ikiqat artıq qazancdan imtina edib. Müdafiəçi olduqca gərgin qrafiki olan “Qarabağ”ı ən çətin günlərində tərk etməyə razı olmayıb. Ağdamlılar seçimi onun öhdəsinə buraxıb, müdafiəçi isə indiki durumda düşərgədən ayrılmağı özünə sığışdırmayıb.

29 yaşlı futbolçunun Çin Super Liqasında mübarizə aparan kluba keçidi hələ də mümkündür. Asiya ölkəsində transfer pəncərəsi martın 5-dək açıq olacaq. “Şençjen Penq Siti” həmin vaxtadək başqa oyunçu tapa bilməsə, Bəhlul Mustafazadə ilə danışıqları bərpa edə bilər.