"Qəbələ"nin müdafiəçisi Eduardo Kunde komandasının qış fasiləsindən sonra Misli Premyer Liqasında keçirdiyi ilk 2 oyunu dəyərləndirib.

Prosport.Az xəbər verir ki, braziliyalı futbolçu ölkəsinin mətbuatına açıqlamasında “Şamaxı”nı 4:0 və “İmişli”ni 3:2 hesabı ilə məğlub etmələrinin vacibliyini vurğulayıb.

28 yaşlı oyunçu bu performansı davam etdirmək əzmində olduqlarını söyləyib: “Qış fasiləsindən sonrakı dönəmə uğurlu başlamaq çox önəmli idi. Biz isə çempionatın ardıcıl 2 oyununda qələbə qazandıq. Bunlar çox vacib məqamdır. Komanda olaraq hər 2 görüşə tam köklənmişdik və böyük fədakarlıqla əla oyun göstərdik. İndi bu nəticələrdən motivasiya kimi istifadə edib inkişafı davam etdirməli və çempionatda toparlanmağa çalışmalıyıq”.

Kunde çempionatda mümkün qədər irəliləmək istədiklərini sözlərinə əlavə edib: “Komandanın potensialına çox inanırıq. Bilirik ki, daha da irəliləyə bilərik. Ardıcıl 2 qələbə düzgün yolda olduğumuzu göstərir”.

Qeyd edək ki, “Qəbələ” hazırda 14 xalla turnir cədvəlinin 10-cu pilləsində qərarlaşır.