"Sumqayıt" Azərbaycan Basketbol Liqasında XVI turunda evdə "Lənkəran"a 102:77 hesabı ilə qalib gəlib.

Prosport.Az xəbər verir ki, matçdan sonra hər iki komandanın baş məşqçisi fikirlərini bölüşüb.

Vadim Kuramşın ("Sumqayıt"): "Uşaqları qələbə münasibətilə təbrik edirəm. Bütün oyunçularımız yaxşı çıxış etdi. Öz meydanımızda parlaq oyun sərgilədik. Onu xüsusi qeyd edim ki, "Sərhədçi" ilə matçda səhvlərimizi təhlil edib nəticə çıxartdıq. Bu gün hakimlik də yüksək səviyyədə idi. Nəzərə alaq ki, "Sərhədçi" ilə ötən matçda bunun tam əksini gördük. Həmin oyunda hakimlər 3 dəfə topun səbətə vaxt bitəndən sonra daxil olduğunu görmədilər. Özüm oyunun təkrarına baxıb bunları gördüm.  Bunu indi xatırlamağı özümə borc bilirəm. Bu mənim başçılığım altında komandamızın ən rahat qələbəsi idi. Bəli, demək olar. Amma bunu da "Lənkəran"ın itkilərlə oynaması ilə bağlayıram. Rəqibin heyətlə bağlı problemləri var idi. Ona görə qələbə belə asan göründü".

Georgi Kondruseviçi (“Lənkəran"): "Biz yenə də çatışmayan heyətlə oynadıq. Yeni oyunçumuz Ceyms Qatluak qeydiyyatdan keçirilmədiyi üçün (bu da bizim günahımız deyil), 4 legionerə qarşı 3 legionerlə çıxış etdik. Buna görə də nəticə gözlənilən idi. Rəqibi təbrik edirəm. Növbəti oyuna hazırlaşacağıq”.