“Qarabağ”ın yeni transferi Jeremi Qnali ilə bağlayacağı müqavilənin müddəti bəlli olub.

Prosport.Az sportinfo.az-a istinadən xəbər verir ki, Çempionlar Liqasında pley-off mərhələsinə vəsiqə qazanmış Ağdam klubu fransalı legionerlə 2 illik sövdələşib. Anlaşmaya əsasən, müqavilə sonradan daha 1 il uzadılacaq.

Bu, “köhlən atlar“ın verəcəyi qərardan asılıdır. O, artıq Azərbaycana gəlib. Kiprin AEK (Larnaka) klubundan dəvət olunan əcnəbi bu gün tibbi baxışdan keçəcək. Sol cinah müdafiəçisinin sağlıq durumunda problem aşkarlanmasa, münasibətlər rəsmiləşəcək.

Kipr təmsilçisi Azərbaycan klubundan gələn təklifi qənaətbəxş hesab edib. AEK-də sol cinah müdafiəçisi mövqeyi üçün daha 2 alternativin (ispaniyalılar – kapitan Anxel Qarsiya və Xayro İskierdo) olması onun ölkəmizə transferini asanlaşdırıb. 23 yaşlı Jeremi Qnali bu mövsüm Larnaka komandasının heyətində meydana çıxdığı 26 rəsmi matçda 5 qol ötürməsi ilə yadda qalıb.