AFFA 20 yaşadək futbolçulardan ibarət Azərbaycan millisinə baş məşqçi axtarışını davam etdirir. U-20 yığmamız gələn il Azərbaycan və Özbəkistanın birgə ev sahibliyi ilə keçiriləcək dünya çempionatında iştirak edəcəyindən, assosiasiya seçimdə yanılmaq istəmir.

Prosport.Az futbolinfo.az-a istinadən xəbər verir ki, komandamızı ölkə daxilində çalışan mütəxəssislərdən birinin çalışdırmaq ehtimalı daha yüksəkdir.

Bir neçə yerli məşqçinin adı bir müddətdir U-20 ilə birgə hallanır ki, onlar arasında Aqil Nəbiyev, İlham Yadullayev kimi aşağı yaş qrupu yığmalarının çalışdırıcıları da var. Lakin AFFA-nın bu post üçün prioriteti fərqlidir. Qurum “Sabah”ın əvəzedicilərdən ibarət komandasının baş məşqçisi Adino Mustedanaqiçin xidmətində daha çox maraqlıdır.

Ötən ilin yayında komandanın “sükanı arxasına” gətirilən xorvatiyalı mütəxəssisin rəhbərliyi altında “Sabah-2” uğurlu çıxışla diqqət çəkir. 43 yaşlı məşqçinin komandası hazırda Əvəzedicilər Liqasına liderlik edir. Bu isə AFFA rəhbərliyinin diqqətini cəlb edib. Milli assosiasiya ilə “Sabah” klubu arasında olan münasibətləri nəzərə alsaq, Mustedanaqiçin U-20-yə gətirilməsi heç də çətin görünmür. Təbii ki, məşqçi özü mənfi cavab verməsə…

Qeyd edək ki, Adino Mustedanaqiç eyni zamanda “Sabah”ın U-19 komandasının da baş məşqçisidir.