“Sərhədçi”nin basketbolçusu Kamerun Uilbon klubun mətbuat xidmətinə müsahibə verib.

Prosport.Az həmin müsahibəni təqdim edir:

- Komandanın son çıxışları o qədər də yaxşı deyil. Bu barədə fikirləriniz nədir və zəif nəticələrin əsas səbəblərini nədə görürsünüz?
- Düşünürəm ki, çətinliklərimizin əsas səbəblərindən biri komandamızın çox gənc olmasıdır. Oyunçuların bir çoxu peşəkar səviyyədə ilk və ya 2-ci mövsümünü keçirir, buna görə də uyğunlaşma dövrü yaşanır. Bundan əlavə, heyətdə tez-tez dəyişikliklər olur. Bəzi oyunçular eyni zamanda başqa komandaların da heyətində çıxış edirlər ki, bu da stabil heyət formalaşdırmağımıza mane olur.

- Son oyunda məğlubiyyətin əsas səbəbi nə idi?
- Düşünürəm ki, son oyunda tam öz oyunumuzu göstərə bilmədik. Təxminən 3 hissə ərzində yaxşı oynadıq, lakin oyunun hamısını eyni səviyyədə keçirə bilmədik. Bundan başqa, əsas oyunçularımızdan biri zədələndi, digər əsas oyunçumuz isə ümumiyyətlə oyunda iştirak etmirdi və bu da bizə təsir göstərdi.

- Azərbaycan Basketbol Liqasının səviyyəsini necə qiymətləndirərdiniz? Mövcud vəziyyətdən razısınızmı?
- Məncə, liqanın səviyyəsi yaxşıdır. Bu, inkişaf etməkdə olan çox perspektivli bir liqadır, gələcəkdə Avropa və Yaxın Şərqin ən güclü liqalarından birinə çevrilə bilər. Ümumilikdə səviyyədən tam razıyam.

- Bakı şəhəri haqqında fikirləriniz nədir? Ümumilikdə şəhəri maraqlı hesab edirsinizmi?
- Şəhəri maraqlı hesab edirəm, xüsusilə də Bakının mərkəzi çox cəlbedicidir. Gəzməli-görməli yerlər çoxdur, müxtəlif məkanlar var və yeməklər çox dadlıdır.

- Azərbaycanda basketbola maraq səviyyəsini necə qiymətləndirirsiniz? Azarkeşlərin dəstəyini hiss edirsinizmi?
- Mənim fikrimcə, Azərbaycanda basketbola maraq səviyyəsi nisbətən aşağıdır. Oynadığım və izlədiyim oyunların çoxunda tribunada az azarkeş olur. Bu baxımdan “Sabah” klubunun oyunları istisnadır.