Danimarka mətbuatı “Qarabağ”ın baş məşqçisi Qurban Qurbanovun işi haqda material hazırlayıb.

Posport.Az xəbər verir ki, tv3sport.dk saytı 53 yaşlı məşqçinin Ağdam klubuna qazandırdığı titullardan və uğurlardan bəhs edib:

“Budəfəki Çempionlar Liqasında 36 klubdan 9-u baş məşqçisini dəyişib. Bunlara “Benfika”, “Monako”, “Union”, “Yuventus”, “Ayaks”, “Çelsi”, ” Brügge”, “Real” və “Ayntraxt” daxildir. Baş məşqçilərin işdən çıxarılma riski olur, amma çox güman ki, "Qarabağ"da bu baş verməyəcək. Çünki 53 yaşlı Qurban Qurbanov, böyük ehtimalla, son sözü özü deyəcək. Qurbanov 2008-ci ildən bəri komandanı 717 oyunda çalışdırıb, o cümlədən Çempionlar Liqasında (seçmə mərhələlər daxil olmaqla) 70 oyun. Baş məşqçi kimi o, “Qarabağ”a 11 liqa titulu və 6 ölkə kubokunu qazandırmağı bacarıb. İndi “Qarabağ” 8-ci turda “Enfild”də “Liverpul”a uduzsa belə, Çempionlar Liqasının pley-off mərhələsinə vəsiqə qazanmaq şansı var”.

Qeyd edək ki, "Qarabağ" bu gün Çempionlar Liqasının Liqa mərhələsinin VIII turunda İngiltərədə "Liverpul"un qonağı olacaq. Görüş saat 00:00-da başlayacaq.