"Ən yaxşı oyunlarımızdan birini göstərəcəyimizə inanıram".

Prosport.Az xəbər verir ki, bu sözləri "Qarabağ"ın baş məşqçisi Qurban Qurbanov UEFA Çempionlar Liqasının əsas mərhələsinin VIII turunda "Liverpul"a qarşı keçirəcəkləri oyundan öncə mətbuat konfransında deyib.

Baş məşqçi onları maraqlı qarşılaşmanın gözlədiyini bildirib: "Əsas mərhələnin son oyununa çıxırıq. Möhtəşəm stadionda və möhtəşəm azarkeşlər qarşısında çıxış edəcəyik. "Liverpul"un heyətində olan futbolçular hər zaman qələbəyə istəklidir. Çox istəyirik ki, İngiltərədə yaxşı oyun sərgiləyək".

Qurban Qurbanov ümid edir ki, bütün futbolçular sabahkı matça tam köklənəcək: "Hazırda hər kəs pley-off mərhələsi barədə danışır. Biz hazırda özümüzü "Liverpul"la oyuna kökləməliyik. Hər vaxt belə komandalarla matçda, bu cür azarkeşlər qarşısında futbolun dadını hiss edə bilmirsən. İnanıram ki, sabah futbolçularımın fikri başqa qarşılaşmalarda yox, bu matçda olacaq. Hər kəs özünü yaxşı tərəfdən göstərməli, nizamlı çıxış etməlidir".

Qeyd edək ki, "Liverpul" – "Qarabağ" oyunu yanvarın 28-dən 29-na keçən gecə baş tutacaq. Matç Bakı vaxtı ilə saat 00:00-da start götürəcək.