“Liverpul”un baş məşqçisi Arne Slotun UEFA Çempionlar Liqasında “Qarabağ"az qarşı keçiriləcək matçla əlaqədar mətbuat konfransı təşkil edilib.

Prosport.Az xəbər verir ki, niderlandlı mütəxəssis əsas futbolçuların durumu, komandanın hazırkı vəziyyəti və oyun planı barədə danışıb.

Onun sözlərinə görə, müdafiəçiləri Co Qomes və İbrahima Konate “Qarabağ”la matçda oynamayacaqlar: “Co sabahkı oyunda iştirak edə bilməyəcək. Konateylə danışdım və bilirik ki, o, çətin günlər keçirir (bugünlərdə atası vəfat edib - red.). Onun tezliklə geri dönməsinə ümid edirəm, amma sabah üçün yox”.

Arne Slot Premyer Liqada hazırkı mövqelərinə görə təzyiqləri dayandırmağın çox çətin olacağını bildirib: “Bir neçə oyunda qələbə qazanmağımız belə səs-küyü dayandırmaz. Belə klublarda çempionluq uğrunda mübarizə aparmırsınızsa, bu təzyiqi dayandırmaq mümkün deyil”.

Mütəxəssis ÇL-də 1 və ya 2 pillə fərqinin o qədər də önəmli olmadığını qeyd edib: “Həm Çempionlar Liqası, həm də Premyer Liqada mübarizə aparmaq bizim üçün çətindir. ÇL oyunlarından sonra çox matçda xal itirdik”.

Slot vurğulayıb ki, Çempionlar Liqasının Liqa mərhələsini ilk "4-lük"də bitirmək istəyirlər və “Qarabağ"a qarşı yaxşı hazırlaşıblar: “Qalib gəlmək istəyirik. Lakin heyətdə zədəli futbolçularımız var. "Bornmut"a qarşı matçda əsas heyətin 11 futbolçusuna şans verməyə bilməzdim. "Qarabağ"ın baş məşqçisi Qurban Qurbanov Azərbaycan çempionatında keçirdikləri son matçda bunu edib. Eyni şeyi mən təkrarlaya bilməzdim”.

Slotun sözlərinə görə, “Qarabağ" öz bacarığını bu mövsüm güclü komandalara göstərib: "Rəqibin heyətində sürətli futbolçular var. Topla rahat rəftar edirlər. "Qarabağ" öz bacarığını bu mövsüm güclü komandalara göstərib. Onlar asanlıqla məğlub ediləcək rəqib deyil. Hətta "Qarabağ" bu mövsüm Çempionlar Liqasında "Çelsi"yə qarşı matçda 2:2 hesablı heç-heçəyə nail olub. Bu da onu göstərir ki, qitənin ən nüfuzlu klub turnirində zəif komanda yoxdur. Bizim cari mövsüm Çempionlar Liqasında qarşılaşdığımız bütün komandalar güclü olub”.

Qeyd edək ki, sabah keçiriləcək görüş Bakı vaxtı ilə saat 00:00-da başlayacaq.