"İndiki halda heç cür "Karate Kombat" turnirində iştirak edə bilmərəm. Çünki mən hazırda həm Azərbaycanın böyüklərdən ibarət yığması ilə işləyirəm, həm də öz klubum var. Klubumda da yetirmələrim inkişafdadır və böyük yarışlara çıxırlar. Düzdür, Avropa və dünya çempionatlarına çıxmasalar da, digər turnirlərə aparıb onları inkişaf etdirirəm. Bu mənim üçün çox çətindir. Həm də yaş o yaş deyil. Bu ilin iyununda 40 yaşım tamam olacaq".

Bunu Prosport.Az-a açıqlamasında idman karatesi üzrə millimizin baş məşqçisi Şahin Atamov deyib.

Gənc məşqçi 2021-ci ildə ABŞ-nin təşkilatı olan "Karate Kombat" turnirində çempion olub. Bəs o, indiki milli üzvlərini o turnirə buraxmağa razıdırmı? Bu suala onun cavabı belə oldu:

"Ümumiyyətlə beynəlxalq qaydada WKF (Dünya Karate Federasiyası) bu yarışda iştiraka icazə vermir. WKF-in onlarla müqaviləsi yoxdur. Orada iştirak edən idmançını WKF bilsə, problem olar. Nəinki "Karate Kombat", başqa təşkilatın yarışında da iştirak etmək olmaz. Məsələn, WSKF-in (Dünya Şotokan Karate-do Federasiyası) yarışlarında 20 idmançı gedib 50 qızıl medal götürür. Bunlar karatenin imicinə təsir edən təşkilatlardır. Mən özüm də ora tələbələr aparıram. Amma mən onlara Avropa və dünya çempionu adını qoymuram. Mən onları təcrübə toplasınlar deyə, belə turnirlərə aparıram. Orada 5-6 döyüş keçirirlər, bu cəhətdən iştirak yaxşıdır. Amma orada çempion olduqdan sonra bunun adını idman karatesində dünya və Avropa çempionu qoymaq düzgün deyil. Get WKF-dən dünya çempionu ol, hamımız səni alqışlayaq. İndiyə kimi WKF-də böyüklər üzrə dünya çempionu olan bircə Rafael Ağayevdir. Dünya 2-cisi və 3-cüsü olanlar da mənəm, Asiman Qurbanlıdır, Ayxan Mamayevdir. Niyazi Əliyev Avropa çempionu olub. Dünya çempionatında nəticə vermək çox çətindir. Ona görə də yaxşısı budur ki, belə turnirlərdə iştirak etməyək. Təklif olsa belə, biz ancaq WKF-də iştirak edəcəyik".

Səbuhi Musa