UEFA Çempionlar Liqasında bu həftə keçiriləcək son turun oyunları ilə Liqa mərhələsinə yekun vurulacaq. Turnirdə Azərbaycanı təmsil edən “Qarabağ” son tur öncəsi pley-offa vəsiqə qazanmağa çox yaxındır.

Ağdamlılar son matçda “Liverpul”a məğlub olsa belə, ilk “24-lük”də qalmaq şansı yüksəkdir. Yalnız turnir cədvəlində “Qarabağ”dan aşağıda olan 7 komandanın hamısı qalib gəlməlidir ki, təmsilçimiz “24-lük”dən kənarda qalsın. Ancaq bu da real görünmür.

Bəs, pley-off və 1/8 finalda komandamızın rəqibi kim ola bilər?

Prosport.Az futbolinfo.az-a istinadən xəbər verir ki, artıq yanvarın 30-da pley-offun püşkü atılacaq. Formata əsasən, 9-10-cu yerlər 23-24-cü yerlərlə, 11-12-cilər 21-22-cilərlə, 13-14-cülər 19-20-cilərlə, 15-16-cılar isə 17-18-cilərlə qarşılaşacaq.

Son turun nəticələrinin ardından komandalar hazırkı mövqelərində qərarlaşsalar, “Qarabağ”ın potensial 2 rəqibi “Yuventus” və Dortmund “Borussiya”sı olacaq. “Liverpul” üzərində sensasiyalı qalibiyyət təmsilçimizin Liqa mərhələsini daha yüksək pillələrdə bitirməsinə gətirib çıxarar ki, belədə nisbətən münasib rəqiblə düşmək imkanı yaranacaq.

1/8 final mərhələsinin formatı da buna bənzərdir. Azərbaycan çempionu Liqa mərhələsini 15-18-ci yerlər aralığında bitirsə və pley-off səddini keçsə, o zaman 1/8 final ən arzuolunmaz rəqibi önünə çıxaracaq. Çünki Liqa mərhələsini ilk iki sırada tamamlayacaq komandalar 1/8 finalda bu raundun 15-18-ci yerlərindəki pley-off cütlərinin qalibləri ilə qarşılaşacaq. Hazırkı durumda isə “Qarabağ”ın 1/8 finaldakı potensial rəqibləri “Arsenal” və “Bavariya"dır.

Qeyd edək ki, yanvarın 30-da pley-offun, fevralın 27-də isə 1/8 finalın püşkatması olacaq. Pley-off mərhələsinin oyunları fevralın 17-18 və 24-25-də, 1/8 finalın qarşılaşmaları isə martın 10-11 və 17-18-də keçiriləcək.