Azərbaycan Premyer Liqasının XVII turunun “Şamaxı” – “Qəbələ” oyunundan (0:4) sonra qonaq komandanın məşqçisi George Çixradze jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb:

– Komandamızı təbrik edirəm. Oyuna çox yaxşı hazırlaşmışdıq. Güclü, bərk rəqiblə oynayacağımızı bilirdik. Yanvarın 4-dən hazırlığa başladıq və bütün toplanışı bu matça hazırlıq kimi keçirdik. Rəqibin taktiki sxemlərinə hazırlaşmışdıq. “Şamaxı” adətən 2 sxemlə oynayır. Bunu təhlil etmişdik. Komandamıza yeni gələnlər – Keyta və Akinade çox yaxşı təsir bağışladılar. Qələbədə pay sahiblərindən oldular.

– Keyta mərkəz müdafiəçisidir, amma bu gün dayaqda oynadı. O, gələcəkdə əsas hansı mövqedə oynayacaq?
– Məcburiyyətdən belə mövqedə oynadı. Heyətdə itkilərimiz var. Dayaq yarımmüdafiəçisi mövqeyinə transfer düşünürük. Sadəcə Xayme Syerra cəzalı olduğu üçün oynamırdı. Keyta topla yaxşı davranır və bu səbəbdən onu dayaqda sınadıq. Kifayət qədər təcrübəli futbolçudur. Məncə, pis təsir bağışlamadı.

– Turan Manafovun adı komanda ilə hallanır...
– Bu transfer üzərində çalışırıq. Kifayət qədər təcrübəlidir. Lakin hələ transfer rəsmiləşməyib, danışıqlar davam edir.

– Baş məşqçi Kaxaber Sxadadze cəzalıdır. Tək özünüzü necə hiss edirdiniz?
– Futbolun bir hissəsidir. Məşqçilər də cəzalana bilər. Hansısa problem olmadı.

– Yeni transferlər keyfiyyətli görünür. Demək olar, yayda edə bilmədiyinizi bu dəfə etdiniz?
– I Liqadan gələndə başqa heyət var idi. Bütün komandaların güclənməsinə ehtiyac olur. Ümumiyyətlə, belə məqsəd var idi ki, I Liqadan gələn heyəti qoruyaq, gənclərə şans verək. Onlara şans verdik. Lakin mövsüm göstərdi ki, güclənməyə ehtiyac var.

– Mövsümün ilk dövrəsində yaxşı oynasanız da, qələbə gəlmirdi. Bu gün həm yaxşı oyun, həm qələbə oldu. Komandanın potensialı budur, ya daha artığını edə bilərsiniz?
– Çempionatın I dövrəsində çox yaxşı oyunlarımız olmuşdu. Bəzən futbol bəxti bizdən üz döndərirdi. Lakin vacib məqam o idi ki, oyunumuz var və nəticəyə çevirməliyik. Çox sevindiricidir ki, həm yaxşı oynadıq, həm qələbə qazandıq.