“Qarabağ” Çempionlar Liqasında növbəti mərhələnin bir addımlığındadır.
Prosport.Az xəbər verir ki, ağdamlılar hətta son turda xal qazanmasa da, pley-offa vəsiqə verən yerlərdən birini tuta bilər.
Hazırda təmsilçimiz 10 xalla 18-ci pillədə qərar tutub. “Liverpul”la son səfər matçında qazanılacaq bir xal digər oyunların nəticələrindən asılı olmayaraq, “Qarabağ”ı ilk 24 komanda arasına salacaq. Amma ən pis və real ehtimal məğlubiyyətdir ki, belə olan halda digər matçların nəticəsini gözləməli olacağıq.
Məğlubiyyət halında daha 3 komandanın uğursuzluğunu arzulamalı olacağıq. Onlardan birinin büdrəyəcəyi dəqiqdir, qalır ikisi…
Hazırda 10 xalı olan iki komandadan digəri “Qalatasaray”dır. İstanbul təmsilçisini ötməyimiz üçün son turda onların “Qarabağ”dan 3 top çox buraxması lazımdır. Ağdamlılar “Liverpul”a qonaq olan zaman “Qalatasaray” da “Mançester Siti” ilə səfərdə görüşəcək.
Amma ən real olan variant digər rəqiblərin büdrəməsini arzulamaqdır. “Kayrat”, “Vilyarreal”, “Slaviya”, “Ayntraxt”, “Ayaks”, “Union”, “Pafos”, “Benfika” və “Bodo Qlimt”in “Qarabağ”a çatmaq şansı yoxdur. Deməli, yarışla vidalaşacaq 12 komandadan 9-u bunlar arasından seçiləcək. Ağdamlılar daha 3 komandadan üstün olmalıdır ki, yoluna davam etsin.
“Qarabağ” üçün təhlükə mənbəyi olan komandalar:
“Brügge” – 7 xal (top fərqi -5): son turda Marsel “Olimpik”ini qəbul edəcək
“Kopenhagen” – 8 xal: son turda “Barselona”ya qonaq olacaq
“Napoli” – 8 xal: son turda “Çelsi”ni qəbul edəcək
“Olimpiakos” – 8 xal: son turda “Ayaks”a qonaq olacaq
“Atletik” – 8 xal: son turda “Sportinq”i qəbul edəcək
PSV – 8 xal: son turda “Bayern”i qəbul edəcək
“Monako” – 9 xal (top fərqi -6): son turda “Yuventus”u qəbul edəcək
“Bayer” – 9 xal (top fərqi -4): son turda “Vilyarreal”ı qəbul edəcək
“Olimpik” (Marsel) – 9 xal (top fərqi 0): son turda “Brügge”nin qonağı olacaq
Top fərqi -2 olan “Qarabağ”ı üstələmək üçün 3 komandaya heç-heçə də bəs edə bilər. 6 komanda isə mütləq qələbə qazanmalıdır. “Brügge” ilə Marsel “Olimpik”inin bir-birini üstələməli olduğunu nəzərə alsaq, digər rəqiblərdən ikisinin maksimum nəticəyə imza atmaması ağdamlılar üçün kifayətdir. “Barselona” evində uduzacaqsa, “Bayern” xalsız qalacaqsa, “Çelsi”, “Ayaks”, “Sportinq” və “Yuventus”un hamısı məğlubiyyət alacaqsa, “Qarabağ” üçün ÇL-də mübarizə bitəcək. Amma bütün bunların baş verməsi sensasiya olar. Ona görə də yuxarıda sadaladığımız komandalardan cəmi ikisinin büdrəməsi təmsilçimiz üçün yetərlidir. Ümid çox, lap çoxdur!…