Bu ayın 11-də Fransa mətbuatı Elvin Cəfərquliyevin "Sent-Etyen"ə mümkün keçidi ilə bağlı xəbər tirajlayıb.
Prosport.Az bu xəbərin əsassız olmadığını üzə çıxarıb.
Məsələ burasındadır ki, 25 yaşlı sol cinah müdafiəçisinin menecer hüquqları FLM (Football Life Management) şirkətindədir. FLM isə Lüksemburqda fəaliyyət göstərən və 34 futbolçunun transfer hüquqlarını əlində saxlayan, 2013-cü ildə yaradılmış Fransa menecer (agent) şirkətidir.
Üstəlik, bu şirkətin müştəriləri arasında Elvin tək azərbaycanlı futbolçu deyil. "Qarabağ"dan Nəriman Axundzadə, Toral Bayramov, Musa Qurbanlı, Hikmət Cəbrayılzadə, Bədəvi Hüseynov, "Zirə"də çıxış edən "Qarabağ"ın sabiq dayaq yarımmüdafiəçisi İsmayıl İbrahimli, eləcə də hazırda klubsuz olan Mirsahib Abbasov müştərilər arasındadır.
Azərbaycan çempionatında çıxış edən legionerlərdən "Zirə"nin Konqo əsilli almaniyalı sol cinah vingeri Leroy Mikels, "Şamaxı"nın Tanzaniya millisində çıxış edən dayaq yarımmüdafiəçisi Alfons Msanqa və "Sumqayıt"ın yaponiyalı hücumameyilli yarımmüdafiəçisi Masaki Murata da transfer hüquqlarını FLM-ə etibar edib.
Həmçinin, 2023/24 mövsümündə "Qarabağ"da çıxış etmiş Seneqal əsilli fransalı mərkəz yarımmüdafiəçisi Adama Diakabi, 2023-2025-ci illərdə "Sabah" və "Zirə" ilə müqavilə bağlamış lüksemburqlu sağ cinah vingeri Vensan Till, elə həmin illərdə "Neftçi"də oynamış fransalı sol cinah vingeri Kilan Lebon da bu müştərilər arasındadır. İlk 2 futbolçu hazırda Almaniyanın 3-cü Liqa klubu (II divizion) olan "Valdhof"da, Lebon isə Cənubi Koreyanın I divizon klubu olan "Çonnam Draqonz"da oynayır. 2019/20 mövsümündə "Zirə"də oynamış milliyyətcə ərəb olan fransalı mərkəz yarımmüdafiəçi Şafik Tiqruca da buradadır.
Bunların arasında Nəriman Axundzadə "Qarabağ"ın heyətində ən çox meydana çıxan hücumçulardan olduğu üçün ən bahalı futbolçu sayılır. "Transfermarkt"a görə, 21 yaşlı futbolçunun transfer dəyəri hazırda 2,50 milyon avrodur. Elvin Cəfərquliyev isə bu sırada 3-cüdür və transfer dəyəri 1,50 milyon avro ilə ölçülür.
Bu şirkət mütəmadi olaraq öz müştərilərinin milliyə çağırılması haqda Instagram hesablarında paylaşımlar edir.
Onu da bildirək ki, "Qarabağ"ın baş direktoru Əmrah Çəlikəl Prosport.Az-a açıqlamasında Elvin Cəfərquliyevə görə "Sent-Etyen"dən rəsmi təklif almadıqlarını bildirib. Buradan belə aydın olur ki, ya menecer şirkəti Elvinin adının Fransa klubu ilə çəkilməsində maraqlıdır, bu səbəbdən mətbuata belə xəbər sızdırılıb, ya da od olmayan yerdən tüstü çıxmaz...
Səbuhi Musa
