“Zaqatala” ilə yoxlama oyunundan sonra bir gün istirahət edən “Araz-Naxçıvan” məşqlərini bərpa edib.

Prosport.Az xəbər verir ki, bugünkü hazırlıqdan əvvəl 20 Yanvar - Ümumxalq Hüzn Günü ilə əlaqədar futbolçulara məlumat verilib, daha sonra Azərbaycanın azadlığı, ərazi bütovlüyü və suverenliyi uğrunda canlarından keçmiş şəhidlərimizin əziz xatirəsi 1 dəqiqəlik sükutla yad edilib.

Hava şəraiti ilə əlaqədar məşq prosesi qapalı meydanda keçirilib. Zədə səbəbindən bir müddətdir komandadan ayrı çalışan İssuf Paro da kollektivə qoşulub.

Qeyd edək ki, “Araz-Naxçıvan” yanvarın 23-də Misli Premyer Liqasının XVII turunda “İmişli” ilə qarşılaşacaq. Quba Olimpiya Kompleksinin stadionunda keçiriləcək matç saat 14:30-da başlayacaq.