“Qarabağ”ın UEFA Çempionlar Liqasındakı növbəti rəqibi olan Almaniyanın “Ayntraxt" klubunun idman direktoru Markus Kröşenin mətbuat konfransı keçirilib.

Prosport.Az xəbər verir ki, klub rəsmisi müdafiə xəttindəki inamsız çıxışın baş məşqçi Dino Toppmöllerlə yolların ayrılmasına səbəb olduğunu bildirib.

O, bu qərarı belə əsaslandırıb: “Müdafiə xəttində inkişaf etmək əvəzinə geriyə getməyə başlamışdıq. Çox sayda eyni ssenarili qollar buraxmağımız əsas problem idi və məşqçi heyətinin buna həll yolu tapacağına inamımız qalmamışdı”.

Kröşe Çempionlar Liqasında pley-off mərhələsinə vəsiqə qazanmaq niyyətində olduqlarını və bu baxımdan Azərbaycan çempionu ilə görüşün həlledici əhəmiyyət kəsb etdiyini vurğulayıb: “Bakıya qalib gəlmək üçün gedirik. Orada qazanacağımız qələbə bizə növbəti turda, İngiltərənin “Tottenhem” klubu ilə ev oyunu öncəsi əlverişli vəziyyət yaradacaq. Bu oyunlarda qələbə qazanaraq pley-off mərhələsinə vəsiqə qazanmaq istəyirik”.

Qeyd edək ki, “Qarabağ” – "Ayntraxt" qarşılaşmasında Almaniya təmsilçisinə müvəqqəti olaraq Dennis Şmitt rəhbərlik edəcək. Matç yanvarın 21-də keçiriləcək.