"Bu açıqlama ilə bildirmək istəyirəm ki, qarşılıqlı razılaşma əsasında "Karvan-Yevlax" Futbol Klubu ilə əməkdaşlığımı başa vurmuşam".

Prosport.Az xəbər verir ki, bu sözləri "Karvan-Yevlax"la yollarını rəsmi şəkildə ayıran Azər Həşimov sosial şəbəkə hesabında yazıb.

Mütəxəssis bildirib ki, son aylarda klub daxilində müəyyən idarəetmə və kommunikasiya çətinlikləri mövcud idi: "Bu müddət ərzində klubun ali rəhbərliyi ilə birbaşa əlaqə qurmaq imkanları məhdud olmuş, məsələlər əsasən aşağı idarəetmə pillələri vasitəsilə müzakirə edilmişdir. Təəssüf ki, bu formatda aparılan danışıqlar konkret nəticə verməmişdi.
Kluba yeni direktorun təyin olunmasından sonra vəziyyət müsbət istiqamətdə dəyişdi. Yeni rəhbərlik tərəfindən açıq dialoq və peşəkar yanaşma nümayiş etdirildi. Məhz yeni direktorun vasitəçiliyi ilə klubun prezidenti ilə birbaşa və konstruktiv müzakirə aparmaq imkanı yarandı".

Yevlax təmsilçisinin keçmiş baş məşqçisinin sözlərinə görə, bu danışıqlar nəticəsində irəli sürdüyü təklif klub prezidenti tərəfindən anlayışla qarşılandı və müqavilə ilə bağlı bütün məsələlər qarşılıqlı razılıq və hörmət çərçivəsində, kompensasiya ödənilməklə həll olundu: "Bu yanaşmaya görə klubun prezidentinə xüsusi təşəkkürümü bildirirəm. Eyni zamanda, qısa müddətdə məsuliyyətli və peşəkar mövqe ortaya qoyan yeni direktor Elvin Əjdərliyə də minnətdarlığımı ifadə edirəm".

Azər Həşimov bu müddət ərzində hüquqi olaraq işlərini aparan Elcan Həsənliyə dərin təşəkkürünü bildirib.

O, sonda isə "Karvan-Yevlax"a, rəhbərliyə, futbolçulara, məşqçi heyətinə və azarkeşlərə gələcək fəaliyyətlərində uğurlar arzulayıb: "Burada çalışdığım müddətdə qazandığım təcrübə və münasibətlər mənim üçün dəyərlidir".

Qeyd edək ki, “Karvan-Yevlax”da icraçı direktor postunda Yevlax Rayon İcra Hakimiyyətində də işləyən Elvin Əjdərli Turan Manafovu əvəzləyib.