"Toplanışın son günü idi. Hazırlıq dönəmində bütün futbolçularımızın oyunlarda 90 dəqiqə iştirak etməsini istədik. Müəyyən səbəblərdən bəziləri bir qədər az oynadılar".

Prosport.Az xəbər verir ki, bu sözləri "Qarabağ"ın baş məşqçisi Qurban Qurbanov Türkiyənin Antalya şəhərində bu gün başa çatan təlim-məşq toplanışı barədə danışarkən deyib.

Mütəxəssis hazırlıq prosesini və keçirilən yoxlama matçlarını dəyərləndirib: "Ümumilikdə bu gün keçirdiyimiz hər 2 görüş yüksək səviyyədə alındı. Ən əsası, intizamlı çıxış etməyə çalışdıq. Futbolçular yorğun olsalar da, bunu bacardılar. İstirahətdən sonra birdən-birə 90 dəqiqə oynamaq heç də asan deyildi. Ümumi hazırlığımızdan və futbolçularımızın işə yanaşmasından razı qaldım".

Qeyd edək ki, “Qarabağ” Antalya toplanışı çərçivəsində ilk yoxlama oyununda Özbəkistanın “Neftçi” (Fərqanə) klubunu 5:0 hesabı ilə məğlub edib. Bu gün 2 matça çıxan Ağdam təmsilçisi əvvəlcə Xorvatiyanın "Osiyek", ardınca isə Polşanın "Zaqlembe" klubuna 3:1 hesabı ilə qalib gəlib.