Premyer Liqada yerini qorumağa çalışan "İmişli" heyətini gücləndirmək üçün transfer çalışmalarını davam etdirir.

Prosport.Az-ın xəbərinə görə, mərkəz hücumçusu İbrahim Əliyevin I Liqa təmsilçisi "Şəfa"ya keçidindən sonra komandanın Bakı Olimpiya Stadionunun ehtiyat meydançasında keçdiyi məşqlərə bir neçə hücumameyilli legionerlər qoşulub.

Bunlardan rusiyalı sol cinah yarımmadafiəçisi, 2018-сi ildə Rusiyanın 18 yaşadək millisinin üzvü olmuş Nikita Şerşnyov artıq ümidləri doğrultmayaraq vətəninə yola salınıb.

Baxışda olan 25 yaşlı Mustafa Turay isə Qambiyadandır. Rəsmi mənbələrdə onun 2027-ci ilin 30 iyununadək Qambiyanın "Falkons" klubuna məxsus olduğu göstərilir. Daha bir qambiyalı futbolçunun isə yanvarın 20-dən sonra düşərgəyə qoşulacağı gözlənilir.

Digər baxışda olan legionerlər Kolumbiyadandır. Bunlardan Xuan Faxardo 19 yaşlı yarımmüdafiəçidir. Oskar Muriyo isə 24 yaşlı mərkəz yarımmüdafiəçisidir. Həmçinin, düşərgədə Xeronimo Kamexo, Xuan Qonsales və Sebastian Blanko kimi kolumbiyalılar var.

Komanda artıq yanvarın 10-da I Liqa təmsilçisi "Şimal"la yoxlama oyunu keçirib və 5:0 hesablı qələbə qazanıb. Lakin bu legionerlər bu matçda çıxış etməyib. Onların I Liqanın lideri "Şəfa" ilə yoxlama matçında oynayacağı gözlənilir.

Qeyd edək ki, "İmişli"də artıq bir kolumbiyalı legioner çıxış edir. Bu, ötən ayın avqustunda 2 illik müqavilə imzalanmış sol cinah müdafiəçisi Edvin Banqeradır.