“Araz-Naxçıvan”ın yeni baş məşqçisi Andrey Demçenko komandanın mövsümün 2-ci yarısına hazırlığını dəyərləndirib.

Prosport.Az xəbər verir ki, ukraynalı mütəxəssis Qazaxıstan mətbuatına açıqlamasında hər şeyin qaydasında olduğunu deyib.

O, hədəflərinin avrokuboklara vəsiqə qazanmaq olduğunu bildirib: “Araz-Naxçıvan”da işlər normal gedir, hər şey iş rejimindədir. Azərbaycanda çempionatın birinci və ikinci dövrələri arasında qısa fasilə var. Burada format fərqlidir, komanda birinci dövrənin son oyununu dekabrın 21-də keçirib. Növbəti matç isə yanvarın 23-nə planlaşdırılıb. Vaxt itirməyə imkan yoxdur, iş tam sürətlə davam edir. Futbolçular iki həftə istirahət etdilər, hazırda isə iki həftəlik hazırlıq prosesi gedir. Qarşıya qoyulan əsas məqsəd avrokuboklara vəsiqə qazanmaqdır”.

Demçenko Qazaxıstan klubu “Jenis”dən ayrılıq prosesini də açıqlayıb: “Jenis”in son oyunu 26 oktyabrda olmuşdu. Noyabrın 1-nə Azərbaycana uçuşum planlaşdırılmışdı. Klub prezidenti ilə görüşdük, məsələləri müzakirə etdik. Bir strukturdan digərinə keçidlə bağlı sənəd işləri aparılırdı. Ona görə də əlaqədə qalmaq barədə razılaşdıq. Görüş normal keçdi, söhbət etdik və sağollaşdıq. Bundan sonra “Jenis”in mümkün qədər yüksəklərə qalxmasını arzulayıram”.

Qeyd edək ki, “Araz-Naxçıvan” 16 turdan sonra Premyer Liqada 26 xalla 6-cı pillədə qərarlaşır.