“Liverpul”un hücumçusu Məhəmməd Salahın UEFA Çempionlar Liqasının son iki turunda Marsel “Olimpik”i və “Qarabağ”a qarşı keçiriləcək oyunlarda iştirakı sual altındadır.

Prosport.Az Britaniya mətbuatına istinadən xəbər verir ki, bu, 33 yaşlı forvardın fiziki durumundan asılı olacaq.

Salahın formasını geyindiyi Misir millisi Afrika Millətlər Kubokunun yarımfinalında Seneqala məğlub olub. Lakin misirlilər sabah Nigeriyaya qarşı 3-cü yer uğrunda oyunda qarşılaşacaqlar. Həmin görüşdən sonra Salah bir neçə günlük istirahət edəcək və ardından “Liverpul”un düşərgəsinə qoşulacaq.

Salah Premyer Liqanın növbəti turunda “Bernli” ilə oyunu buraxacaq. Onun Çempionlar Liqası çərçivəsində yanvarın 21-də Marsel səfərində də iştirakı sual altındadır. Afrika Millətlər Kubokundakı sıx qrafikin ardından fiziki yorğunluğu olduğu bildirilən Salahın fevrala qədər istirahət edə-edə bəzi oyunlarda iştirakı nəzərdə tutulub. Məşqçilər korpusu onu ən yaxşı halda “Qarabağ”la matçda start heyətində meydana buraxa bilər. Lakin bunun da dəqiq olmadığı vurğulanıb.

Qeyd edək ki, “Liverpul” – “Qarabağ” oyunu yanvarın 28-də “Enfild Roud”da keçiriləcək.