"Çox yaxşı komandaya qarşı oynadıq".

Prosport.Az xəbər verir ki, bu sözləri "Qəbələ"nin baş məşqçisi Kaxaber Sxadadze “Araz-Naxçıvan"a 1:0 hesabı ilə qalib gəldikləri yoxlama oyunundan sonra deyib.

Gürcüstanlı mütəxəssis Naxçıvan klubunun yeni çalışdırıcısı Andrey Demçenkonu çoxdan tanıdığını bildirib: "Çox yaxşı mütəxəssisdir. Belə komandaya qarşı düzgün oynamalı idik. 2-ci yoxlama oyunumuzu keçirdik. İlk görüşə nisbətən bu gün daha yaxşı təsir bağışladıq. Hava şəraitinin əlverişsiz olmasına  baxmayaraq, yaxşı mübarizə getdi".

Sxadadzenin sözlərinə görə, nəticə elə bir önəm kəsb etmir: "Əsas futbolçuları yoxlamaqdır. Hər 2 komanda yaxşı mübarizə apardı. Əsas odur ki, oyunda zədələnən olmadı. Keyta bu gün debüt etdi, həmçinin Akinade 2-ci oyununa çıxdı. Hər iki futbolçudan razı qaldım".