I Liqa təmsilçisi MOİK-də çıxış edən futbolçu Seyxan Fərəcov qış fasiləsindən sonra da "hərbçilər"in formasını geyinəcək.

Prosport.Az-ın xəbərinə görə, Premyer Liqanın debütantları – "İmişli" və "Karvan-Yevlax" I Liqada 11 qolla (2 məhsuldar ötürməsi də var) bombardir olan 24 yaşlı hücumçunu istəyir.

Xüsusən bunda "İmişli" maraqlıdır. Seyxanın özü də ötən mövsüm I Liqada çıxış etdiyi kluba geri dönmək istəyir. Lakin futbolçunun yaxınlarda "Futbol+" qəzetinə verdiyi müsahibədə "İmişli"dən təklifin olduğunu bildirməsindən sonra hər şey dəyişib. MOİK rəhbərliyi futbolçunu saxlamaq qərarına gəlib. Hərçənd, "İmişli" futbolçu üçün şərti məbləğ – 10 min manat transfer pulu verməyə də razı imiş.

Görünür, 14 xalla 6-cı olan MOİK-in rəhbərliyi ya daha çox pul istəyir, ya da Premyer Liqaya çıxmağı qarşısına hədəf qoyub. Halbuki lider "Şəfa" ilə arada 16 xal fərq var ki, belə olan durumda Premyer Liqa arzusu real görünmür.