I Liqada çempionluq uğrunda mübarizə aparan "Səbail" heyətini yeni hücumçu ilə gücləndirib.

Prosport.Az xəbər verir ki, Bakı klubu “Şahdağ Qusar”ın bombardiri (7 qol) Ruslan Voronsovla anlaşıb.

Daha əvvəl liqanın lideri “Şəfa”yla anlaşan 30 yaşlı futbolçu "dənizçilər"dən daha sərfəli təklif aldıqdan sonra fikrini dəyişib. Forvard 500 manatlıq maaş fərqinə görə bu addımı atıb. "Şəfa” hər ay üçün 1800 manat təklif edirdisə, “Səbail”dəki qazancı 2300 manat olacaq.

Qeyd edək ki, Mingəçevir futbol məktəbinin yetirməsi olan Ruslan Voronsovun karyerası əsasən I Liqa təmsilçiləri ilə bağlıdır. O, müxtəlif illərdə MOİK, “Şəmkir”, “Zaqatala”, “Qaradağ Lökbatan”, “Karvan-Yevlax”, “Mingəçevir”, “Qəbələ” kimi komandaların formasını geyinib.