"Hazırlıq oyunlarında nəticə əsas deyil. Önəmli olan bütün oyunçuları iş başında görmək və müxtəlif taktiki gedişləri yoxlamaqdır. Bu gün də həm təcrübəli, həm də gənc futbolçuların oyununu gördük və həmçinin bir neçə taktiki gedişi sınadıq".

Prosport.Az xəbər verir ki, bu sözləri "Sumqayıt"ın baş məşqçisi Saşa İliç Antalyada Serbiyanın OFK klubuna 1:4 hesabı ilə uduzduqları oyundan sonra deyib.

Serbiyalı mütəxəssis komandada hələ də bəzi boşluqların olduğunu bildirib: "Bu dəfə də fərdi səhvlər ucbatından qollar buraxdıq. Bütün bunların fərqindəyik. Səhvlərimizin aradan qaldırılması üçün çalışırıq. Qarşıda bir yoxlama oyunumuz qalıb. Ümid edirik ki, hazırlıq prosesinin sonuna qədər qarşımıza qoyduğumuz bütün tapşırıqları icra edib, çempionatın ikinci yarısına tam hazır olacağıq".

Qeyd edək ki, "Sumqayıt" Türkiyədəki ilk yoxlama matçında Macarıstanın "Pakş" klubuna 1:5 hesabı ilə məğlub olub.