Azərbaycanın 21 yaşadək futbolçulardan ibarət millisinin üzvü Həsən Nəzərli Türkiyənin "Ankaragücü" klubundan ayrılır.

Prosport.Az xəbər verir ki, 19 yaşlı hücumameyilli yarımmüdafiəçi bunu jurnalistlərə açıqlamasında bildirib.

O, U-21-in təlim-məşq toplanışı barədə də danışıb: "Dünən ilk məşqimizi etdik. Bu gün 2-ci hazırlıq prosesidir. Hamımızın hədəfi birdir – qarşıdakı oyunlarda qələbə qazanmaq. Bunun üçün əlimizdən gələni edirik".

Həsən Nəzərli 2023-cü ildən çıxış etdiyi, ötən yay peşəkar müqavilə bağladığı Türkiyənin II Liqa klubu "Ankaragücü"ndəki gələcəyinə də aydınlıq gətirib: "Klubdakı durumum yaxşıdır, lakin böyük ehtimalla bu qış komandadan ayrılacağam. Səbəb legioner limiti ilə bağlıdır. Azərbaycan pasportum olduğu üçün orada oynaya bilmirəm. Artıq təkliflər var və transfer dövründə onları dəyərləndirəcəyəm. Karyeramı Türkiyə xaricində, Avropada davam etdirmək niyyətindəyəm".

Qeyd edək ki, U-21 yanvarın 16-da "Səbail", 1 gün sonra isə "Şamaxı" ilə yoxlama oyunu keçirəcək.