"Akademiyadan 4 oyunçunu yoxlamaq imkanımız oldu. Onlar yaxşı təsir bağışladılar. İnanıram ki, gələcəkdə həmin futbolçular əsas komandaya namizəd olacaqlar. Yeni transferimiz Veysəl Rzayev də ilk oyununa çıxdı və qənaətbəxş təsir bağışladı".

Prosport.Az xəbər verir ki, bu sözləri "Kəpəz"in baş məşqçisi Azər Bağırov "Qəbələ"yə 1:3 hesabı ilə uduzduqları yoxlama oyunundan sonra deyib.

Mütəxəssis komandada çatışmazlıqların olduğunu etiraf edib: "Komanda uyğunlaşmalıdır. İkihissəli oyunda ilk "onbirliy"imizi meydana buraxmadıq, fərqli heyətlərin təzyiq altında oynamasını istədim. Əsas odur ki, matçı zədəsiz və itkisiz başa vurduq. Bir həftədir məşqlərə başlamışıq. İnanıram ki, çempionatın startına qədər komanda istədiyimiz səviyyəyə çatacaq".