"Saşa İliç komandası ilə gözlənilməz, fenomenal nəticələr əldə edir. Oyundan-oyuna daha da yaxşılaşırlar. Məşqçinin imzasını göstərən təkcə nəticələr deyil, həm də yaxşı futboldur. Mən onu çox istədiyim üçün deyil, işində yaxşı olduğu üçün tərifləyirəm".

Prosport.Az xəbər verir ki, bu sözləri “Qarabağ”ın futbolçusu Marko Yankoviç deyib. “Mozzart Sport”a açıqlama verən monteneqrolu yarımmüdafiəçi keçmiş baş məşqçisi, hazırda “Sumqayıt”ı çalışdıran Saşa İliç haqda danışıb. 

Yankoviç “Sumqayıt”ın Misli Premyer Liqasındakı durumuna da toxunub: "Sumqayıt" adətən liqada turnir cədvəlinin sonlarında qərarlaşan komandadır və əsas məqsədi liqada qalmaqdır. Bütün hörmətimlə deyirəm, bir neçə ildir buradayam, ona görə də hər şeyi yaxşı bilirəm. Onların yeni, gözəl stadionu, əla məşqçiləri var. Belə komandalar investisiyaya layiqdirlər. Saşa İliç daha ciddi komandalarda və liqalarda çalışıb. Bu, onun karyerasında sadəcə bir fasilədir, çünki o, bir müddət klubsuz qalıb. Bundan sonra İliçi çox ciddi komandada görəcəyimizi gözləyə bilərik, çünki o, həqiqətən buna layiqdir".