Çempionlar Liqasında pley-off mərhələsinə yüksəlmək istəyən “Qarabağ” Premyer Liqanı da unutmur. Bu səbəbdən komanda transfer bazarında fəaldır.

Prosport.Az futbolinfo.az-a istinadən xəbər verir ki, baş məşqçi Qurban Qurbanov Zaqreb “Dinamo”sunun hücumçusu Xuan Kordobanı sərəncamında görmək istəyir. Artıq Ağdam klubu 22 yaşlı kolumbiyalı üçün qarşı tərəfə təklif göndərib. Lakin xorvatlar hələ Azərbaycan təmsilçisinə cavab verməyib. Çünki zaqreblilər gənc forvardın qarşılığında “Qarabağ”dan Marko Yankoviçi qoparmaq niyyətindədir.

Əslində, ağdamlılar da buna isti yanaşır. Monteneqrolu yarımmüdafiəçi özü də Azərbaycandan getmək fikrindədir. Məhz onun qalmaqda istəksiz olması bu dəyişikliyə kömək edə bilər.

Kordoba karyerasına ölkəsindəki “Deportivo Kali” klubunda başlayıb. 2022-2024-cü illərdə burada çıxış edən oyunçu 1 mövsüm icarə əsasında “Fortaleza”da da top qovub. 2024-cü ildə isə onun yolu Avropaya düşüb və “Dinamo” ilə müqavilə imzalayıb.

Kordobanın gəlişi ilə “Qarabağ”dakı kolumbiyalıların sayı 3-ə çatacaq. Bu ölkədən Ağdam təmsilçisində Kevin Median və Kamilo Duran oynayır. Məhz onların da komandada olması bu keçidin baş vermə ehtimalını yüksəldir.