"Qarabağ"ın baş məşqçisi Qurban Qurbanovun qış planı üzə çıxıb.

Prosport.Az sportinfo.az-a istinadən xəbər verir ki, təcrübəli mütəxəssis rəhbərlikdən 3 yeni transfer istəyib. O, mərkəz hücumçusu, mərkəz müdafiəçisi və cinah yarımmüdafiəçisi mövqelərini gücləndirəcəyi barədə onları məlumatlandırıb. 2008-ci ildən "köhlən atlar"ın sükanı arxasında olan Qurbanovun fikrincə, hazırkı heyətə müəyyən qədər rotasiya lazımdır.

"Qarabağ"ı Çempionlar Liqasında 2 vacib qarşılaşma gözləyir. Azərbaycan çempionu qitənin ən mötəbər turnirinin əsas mərhələsinin son 2 turunda "Ayntraxt" və "Liverpul"la üz-üzə gələcək.

Bu matçılar yanvar ayı ərzində keçiriləcək. Ağdam təmsilçisi öncə Bakıda almanları qəbul edəcək, ardınca İngiltərə səfərinə yollanacaq.

"Qarabağ" 6 tura 7 xal toplayıb və ümumi turnir cədvəlində 22-ci pillədə yer almaqdadır. Əsas mərhələni ilk "24-lük"də bitirənlər pley-offa vəsiqə qazanacaq.

Aydın məsələdir ki, belə bir şans yarandığından, Qurban Qurbanov da onu dəyərləndirməyi arzulayır.