“Qarabağ”ın Mərakeş millisinin futbolçusu Xalid Babanı transfer etmək cəhdləri nəticəsiz qalıb.

Prosport.Az xəbər verir ki, Ağdam təmsilçisinin maraq dairəsində olan hücumameyilli yarımmüdafiəçi ölkəsinin MAS klubuna transfer olunub. Bu barədə “Africafoot” nəşri məlumat yayıb.

İddiaya görə, “Qarabağ” sağ cinah oyunçusu üçün təklif irəli sürsə də, transfer mübarizəsində yerli klub daha operativ davranıb. Nəticədə futbolçu “Difaa"dan ayrılaraq MAS-la razılıq əldə edib.

Bildirilir ki, keçid təxminən 400 min avro qarşılığında baş tutub. 25 yaşlı vinger yeni klubu ilə 3,5 illik müqaviləyə imza atıb. Qeyd olunur ki, futbolçuya “Qarabağ” tərəfindən də cəlbedici təklif təqdim edilib. Lakin idman və maliyyə şərtlərinin bir-birinə yaxın olması fonunda o, yerli çempionatda qalmağa üstünlük verib.

Xatırladaq ki, Xalid Baba “MAS Fes” akademiyasının yetirməsidir. O, karyerası ərzində KAK və “Vidad" klublarında da çıxış edib. Son mövsümlərdə isə “Difaa"nın əsas oyunçularından birinə çevrilib.