Braziliyalı müdafiəçi Eduardo Kunde bu yay keçdiyi "Qəbələ"də keçirdiyi vaxtdan danışıb.

Prosport.Az xəbər verir ki, “Jornal Ibia” nəşrinə danışan futbolçu Azərbaycanda xoşbəxt olduğunu bildirib:

"Braziliyadan kənarda yaşadığım təcrübə sayəsində dil və mədəniyyət kimi bütün digər məsələlərə öyrəşmişəm. Yaponiya və İndoneziyada oynamışam, Asiya ölkələri həm mədəniyyətə, həm də futbolun özünə böyük təsir göstərir. Düşünürəm ki, onlar daha çox qaçırlar. Lakin bu, çox vaxt lazımsız olur. Digər tərəfdən, Bolqarıstan daha yüksək taktiki və texniki səviyyəyə malikdir. Azərbaycanda həm texniki, həm də taktiki cəhətdən ən keyfiyyətli komandalar gördüyüm ölkədir. Bu, çox yaxşı təşkil olunmuş liqadır. Komandalar kompakt və mütəşəkkil qalarkən topa sahib olmağa və sürətli hücumlara üstünlük verirlər. Azərbaycan çempionatı məni həqiqətən təəccübləndirdi. “Qəbələ”ni seçməyim düzgün qərar idi. Burada oynamaqdan çox xoşum gəlir".

Kundenin fikrincə, mövsümün qalan hissəsində “Qəbələ” daha uğurlu olacaq: "Hazırda çempionatda sondan 2-ci yerdə olsaq da, komanda mövsümün qalan hissəsində vəziyyəti yaxşılaşdırmaq imkanına sahibdir. Azərbaycan Kubokunda artıq ilk 2 mərhələni keçərək 1/8 finala vəsiqə qazanmışıq. Məqsədimiz titul uğrunda mübarizə aparmaqdır. Bu, vacib turnirdir".

Braziliyalı müdafiəçi Azərbaycanda tək yaşamadığını söyləyib: "Həyat yoldaşı və bir yaşlı oğlum mənim əsas dayağımdır. 2024-cü ilin sonundan bəri peşəkar karyeramı ata rolu ilə birləşdirmişəm. Bu, xüsusilə ölkə xaricində böyük bir çətinlik və məsuliyyətdir. Eyni zamanda, ailəmin yanımda olmasından çox qürur duyuram. Həyat yoldaşım olmasaydı, bunların heç biri mümkün deyildi".