AFFA milli komanda üçün vəd etdiyi mükafatı hələ də verməyib.

Prosport.Az xəbər verir ki, söhbət III MDB Oyunlarında gümüş medal qazanmış U-16 yığmasından gedir.

Bu barədə adıçəkilən millidə çıxış edən uşaqların valideyinləri sportinfo.az-a şikayət ünvanlayıb.

Amma adlarının məxvi qalmasını istəyiblər.

Deməli, oktyabrın 4-də Qəbələdə keçirilən final oyununda Rusiya yığmasına uduzan Aqil Nəbiyevin yetirmələrinə matçdan əvvəl qələbə təqdirində 15 min manat, məğlubiyyət yaşanacağı halda 5 min manat mükafat vəd olunub.

Amma federasiya arxada qalan 2 aydan artıq müddətdə vədini yerinə yetirməyib.

Valideyinlər bildirib ki, nəinki mükafat, hətta Qəbələdə keçən 1 günə görə nəzərdə tutulan 40 manat ödəniş də futbolçulara verilməyib.

Məsələnin ən pis tərəfi isə odur ki, rəsmilərlə nə gecikməyə bir aydınlıq gətirir, nə də mükafatın nə vaxt veriləcəyi ilə bağlı bir söz deyir.