"Şamaxı" yeni mövsümə Ayxan Abbasovla başlaya bilməyəcək.

Prosport.Az sportinfo.az-a istinadən xəbər verir ki, mütəxəssis gələn ilin iyununda "şirlər"lə əməkdaşlığı dayandıracaq. Bu, AFFA-nın tələbidir. Qurum millilərlə bağlı yenilik etməyi qərara alıb.

Tələbə əsasən, əsas və aşağı yaş qrupları üzrə yığmalara təyinat alan məşqçilər bundan sonra eyni vaxtda 2 yerdə işləyə bilməyəcək. Onlara seçim haqqı tanınıb – ya klub, ya milli.

A.Abbasov artıq öz seçimini edib və bu barədə federasiya rəhbərliyini məlumatlandırıb. 2024-cü ilin yayından bəri "Şamaxı"da olan mütəxəssis əyalət təmsilçisindən getməyi üstün tutub. Sadəcə, hazırda müqaviləsi davam etdiyindən, gələn ilin yayınadək "şirlər"in başında dayanacaq.

AFFA seçim qarşısında qalan məşqçilərin maddi durumunu nəzərə alıb. Millidə fəaliyyət göstərməyə isti yanaşanların əməkhaqları artırılacaq. Yəni, bundan sonra vəsait azlığından əziyyət çəkməyəcəklər.

Azərbaycan yığması qarşıdakı Millətlər Liqasına Ayxan Abbasovla gedəcək. Federasiyadan bildirilib ki, İcraiyyə Komitəsi (İK) yaxın günlərdə yığışacaq və onun təyinatını təsdiqləyəcək. O, ən azı 1 il ölkənin əsas komandasının sükanı arxasında əyləşəcək. Qurumun prezidenti Rövşən Nəcəf onunla bağlı müsbət fikirdədir. Abbasov İK-nin ötən toplantısında 30 dəqiqəyə yaxın iştirak edib və millinin DÇ-2026-nın seçmə mərhələsindəki çıxışına dair hesabat verib. Gənc mütəxəssis 1 xal toplayan kollektivin ümumi durumu barədə ali qərarverici orqanın üzvlərini məlumatlandırıb.

O, həmçinin perspektiv haqda danışıb, tədricən islahatların aparılması gərəkdiyini söyləyib. Nəcəf Abbasovun fikirlərini dəstəkləyib, bu yolda növbəti addımların atılmasının istəyib.