"Neftçi"nin qapıçısı Kenan Piriç gələn ilin yanvarında komandadan ayrıla bilər.

Prosport.Az xəbər verir ki, bosniya və herseqovinalı qolkiperə Türkiyə və Polşa klublarından maraq var. Bu barədə jurnalist Rudi Qaletti məlumat yayıb.

Polşanın “Vidzev” klubu Piriçi yaxından izləyir. Qapı xəttini gücləndirməyi planlaşdıran Lodz təmsilçisi 31 yaşlı "əlcək sahibi"nə gələcək üçün etibarlı variant kimi baxır.

Türkiyənin 2 klubu da "Neftçi"nin futbolçusunu transfer etmək istəyir. Bunlar "Qaziantep" və Piriçin sabiq klubu "Antalyaspor"dur.

Xəbərdə qeyd olunub ki, Piriçin “Neftçi” ilə müqaviləsi 2027-ci ilin iyununa qədər qüvvədə olsa da, təxminən 300 min avro məbləğində sərbəst qala bilər.

Qeyd edək ki, Kenan Piriç mövsümün əvvəlindən Bakı klubunda çıxış edir. Təcrübəli qapıçı "ağ-qaralar"ın heyətində meydana çıxdığı 17 rəsmi matçda 18 qol buraxıb. O, 6 qarşılaşmada qapsını toxunulmaz saxlamağı bacarıb.