Misli Premyer Liqasının XVI turunun “Karvan-Yevlax” – “Neftçi” oyunundan (1:2) sonra qonaq komandanın baş məşqçisi Yuri Vernidub jurnalistlərin suallarını cavablandırıb.
Prosport.Az xəbər verir ki, mütəxəssis media nümayəndələri ilə görüşdə fikirlərini bölüşüb.
– 2-ci hissədə daha aktiv olan “Neftçi” nə üçün 1-ci hissədə bu oyunu oynaya bilmədi?
– 2 fərqli hissə oldu. 1-ci hissədə oyunçular gözlənilən sürəti, intensivliyi göstərə bilmədilər. Rəqib də ciddi epizodlar yarada bilməmişdi. Onlara penalti şansı verdik. 2-ci hissədə tamamilə başqa cür oldu. Oyunçulara bildirdim ki, sürəti artırmasaq, heç nə alınmayacaq. Fasilədən sonra ilk dəqiqələrdən rəqib oyunun vaxtını aparırdı. Buna görə də irəli atıldıq ki, oyunun taleyini müəyyən edək. 2-dən daha çox qol vura bilərdik. İmkanlarımız oldu, lakin dəyərləndirə bilmədik. 100 faizlik epizodlarımız var idi. Faraj, Sambu çox fürsət qaçırdı.
– İlk səfəriniz bölgəyə oldu. Buradakı ab-hava haqda fikirləriniz nədir? Süni örtüklü meydança haqda nə düşünürsünüz?
– Ukraynada sintetik meydançada oynamağa icazə verilmir, amma burda normaldır. Hər iki komanda üçün şərait eyni idi. Düzdür, daha çox təbii örtüklü meydançada məşqlər keçirik. Daha tez gəlib, hazırlaşa bilərdik, amma istəmədim. Çünki məşq zamanı zədə ehtimalı var idi.
– Komandaların formaları bir-birinə çox bənzəyirdi. Sizcə, qeyri-dəqiq ötürmələrə səbəb bu idi?
– Mənə də elə gəlirdi ki, formalar oxşardır. Bizdə ağ, rəqibdə ağ-qara idi. Bəlkə də, müəyyən məqamlarda oxşarlıqlar olurdu. Daha dəqiq oyunçulardan soruşmaq lazımdır.
– Vensan Abubakar gəlişinizdən sonra daha az şans qazanır. Ona ismarıc verirsiniz ki, sisteminizə uyğun deyil?
– Abubakar dünya futbolunun ulduzudur. Ona ismarıcım yoxdur. Komandaya mövsümün ortasında qoşulub. Durumu haqda nəsə demək çətindir. Daha çox məşqlərdən sonra dəqiq nəsə demək olar.
– Ötən mətbuat konfransında demişdiniz ki, komandada 2 problem var – fiziki durum və oyun intizamı. Hansını düzəltmək daha asandır?
– “Sumqayıt”la oyundan 5 gün keçib. Bu müddətdə fiziki durumu düzəltmək demək olar, mümkün deyil. Ona görə futbolçulara daha az yüklənmə verdik. Oyun intizamını düzəltmək üzrəyik. Dediklərimə əməl etməyən oyunçular daha az oynayacaq. Futbolçulara hörmət edirəm və onlardan bunun qarşılığını gözləyirəm.
– Andrey Ştoqrinin komandada qalmaq ehtimalı var?
– Toplanışlarımız olacaq. Vəziyyətə baxacağıq. Ştoqrini Ukraynadan tanıyıram. Qalmasını çox istərdim. Çox yaxşı fiziki formadadır. O, nəinki 90, 120 dəqiqə oynamağa hazırdır. Kapitan Emin Mahmudov da artırıb və komandanı arxasınca aparır. Çünki kapitan lider olmalıdır. O, mənim 1-ci köməkçimdir.