II Liqa təmsilçisi “Şəki Siti” bu gün saat 14:00-da başlamalı olan “Qaradağ-Lökbatan”la oyuna çıxmayacaq.

Bunun səbəbləri barədə Prosport.Az-a komandanın baş məşqçisi Elvin Həsənov deyib.

Gənc məşqçi bildirib ki, klub rəhbərliyi üzərinə düşən maliyyə öhdəliyini yerinə yetirmədiyinə görə meydana çıxmayacaqlar: “Bu kluba gəldiyim oktyabrdan bəri rəhbərlik maliyyə öhdəliklərini yerinə yetirmir. Deyirlər ki, əvvəlki baş məşqçinin vaxtında kluba 240 min manat ayrılıb. Məndən əvvəl olanlara görə məsuliyyət daşımıram. Verilən vədlərə görə “Quba”dan ayrılıb bura gəldim. Heyətimiz I Liqaya çıxmağa imkan verir. Klubu 6-cı yerdən yuxarı qaldırdım. 3 turdur ki, ordan-burdan borc-xərc tapıb oyuna çıxırıq. Bakıda ev oyunlarımızı keçirdiyimiz “Rekord Arena”ya borcumuz yaranıb. Artıq onlar da bizi stadiona buraxmaq istəmir. Ötən tur “Araz Saatlı” ilə də oyuna çıxmaq istəmirdik. Çıxıb 4:0 qalib gəldik. İndi əsas rəqiblərimizdən olan “Qaradağ Lökbatan”la səfər oyununa çıxmaq fikrimiz yoxdur”.

Elvin Həsənov bir neçə dəfə rəsmilərlə görüş keçirildiyini bildirsə də, xeyri olmadığını vurğulayıb: “Əsas sponsor “Flyblast Travel Agency”nin təsisçisi Rövşən Abdullayevlə, klubun İdarə Heyətinin sədri Vüqar İsgəndərov və Futbolun İnkişaf Fondunun rəhbərliyi ilə görüşlərimiz olub. Düzələcəyi bildirilib, ancaq heç nə dəyişməyib. Sonuncu dəfə PFL prezidenti Elxan Səmədov da hər şeyin yaxşı olacağını, səbirli olmağımızı dedi. Ancaq maaş almırıq. Klubun təsisçisi Elgün Hüseynov da bu durumdan narazıdır”.

Qeyd edək ki, “Şəki Siti” hazırda 25 xalla 4-cü sıradadır. Lider “Xankəndi” ilə eyni xala (33) malik olan “Qaradağ-Lökbatan” isə 2-cidir.

Səbuhi Musa