“Qarabağ”ın sabiq futbolçusu Juninyo Olavionun yeni komandası müəyyənləşib.

Prosport.Az Braziliya mətbuatına istinadən xəbər verir ki, “Flamenqo”nun hücumçusu karyerasını Meksikada davam etdirəcək. 28 yaşlı forvard “Pumas”la anlaşıb.

Klublar arasında danışıqlar, demək olar ki, yekunlaşıb. İlin sonunda transferin rəsmiləşməsi gözlənilir.

Tərəflər 5 milyon avroda ortaq məxrəcə gəliblər. Futbolçu özü də bəzi təkliflərə baxmayaraq, “Pumas”ın formasını geyinməyə müsbət yanaşır.

Bu isə o deməkdir ki, “Qarabağ”ın Juninyonu qaytarmaq və Braziliyanın digər klubu “Bahia”nın isə transfer arzusu baş tutmayacaq.