"Maraqlı oyun alındı. "Qəbələ" də,  "Kəpəz" də daim hücumda idi. Yenə qol epizodlarını dəyərləndirə bilmirik. Bu, məşqçilər korpusu olaraq bizi yorur. Bugünkü oyun 9 xala bərabər idi. Həm "Qəbələ"ni keçdik, həm də "Karvan-Yevlax"dan uzaqlaşdıq".

Prosport.Az xəbər verir ki, bu sözləri “Kəpəz” in baş məşqçisi Azər Bağırov Misli Premyer Liqasının XV turunun "Qəbələ" ilə görüşündən (1:0) sonra keçirilmiş mətbuat konfransında deyib.

O, jurnalistlərin suallarını da cavablandırıb.

- Yusif İmanovun oyunu sizi qane edir?

- Yusif 1 ildən çoxdur ki, oynamırdı. Meydanda olduğu matçlarda komandaya kömək edir. Səhvlər qaçılmazdır. Oyundan-oyuna daha yaxşı olur.

- Ohorinin oyununu necə dəyərləndirirsiniz?

- Komandamızın çoxu yerli futbolçulardan ibarətdir. Səhvlər hamımızda var. Futbolçu meydanda mübarizə aparırsa, səhv etməlidir. Sevindirici hal odur ki, bir neçə oyunçu inkişaf edir. Ohori də onlardan biridir. Onu bir çox mövqedə oynadırıq. Futbolçu da bunun öhdəsindən gəlir.

- Luis Paçunun ehtiyatda qalmasının səbəbi nə idi?

- Taktiki qərar idi. "Qəbələ" arxadan topla çıxmağı yaxşı bacarıır. Ehtiram Şahverdiyev öndə daha yaxşı pressinq edir. Ona görə start heyətində ona şans verdik.