"Neftçi”nin yeni baş məşqçisi Yuri Vernidub Ukraynanı hansı qaydada tərk etməsi ilə bağlı açıqlama verib.

Prosport.Az xəbər verir ki, 59 yaşlı mütəxəssis "tribuna.com"a müsahibəsində ölkədən çıxmaq üçün rəsmi şəkildə icazəsi aldığını deyib. Onun sözlərinə görə, bu icazə başa çatacaq müqaviləsinin müddətinə qədər qüvvədədir.

"Neftçi" daha əvvəl Vernidubla 1,5 illik müqavilə bağladığını elan edib.

“Xaricə çıxmaq üçün müqaviləm bitənə qədər icazə aldım. Müddət bitdikdən sonra mütləq qayıtmalıyam və bunu edəcəyəm. Əgər daha tez ehtiyac yaranarsa, o zaman da qayıda bilərəm. İcazə yüksək səviyyədə təsdiqlənib. Başqa kim belə sənəd verə bilər ki? Kim tərəfindən verildiyini isə dəqiq bilmirəm. Yalnız onu bilirəm ki, həmin sənəddə mənim və köməkçilərimin adları var”, – deyə Vernidub bildirib.

Mütəxəssis əlavə edib ki, onun köməkçiləri də eyni qaydada rəsmi icazə ilə ölkədən çıxıblar: “İcazə olmasaydı, heç kim ölkədən çıxa bilməzdi.”

Ukraynalı mütəxəssis hazırda bütün diqqətini komandanın inkişafına yönəltdiyini deyib: “Hazırda tam şəkildə işə fokuslanmışıq: baxırıq, öyrənirik, analiz edirik. Gələcəyi isə həyat göstərəcək”.

Xatırladaq ki, Ukraynada hərbi vəziyyət olduğuna görə, yaşı 60-dək olan kişilər ölkə ərazisini yalnız xüsusi razılıqla tərk edə bilərlər.