Portuqaliyanın “Benfika” klubunun baş məşqçisi Joze Mourinyo etiraf edib ki, Çempionlar Liqasının Liqa mərhələsinin startında “Qarabağ”a məğlubiyyət komandanı turnir cədvəlində çətin vəziyyətə salıb.

Prosport.Az xəbər verir ki, portuqaliyalı mütəxəssis bu barədə İtaliyanın “Napoli” klubu ilə VI tur oyunundan (2:0) sonra təşkil edilən mətbuat konfransında deyib.

“Bizim 6 xalımız var. Əgər “Benfika” qrupun ilk oyununda evdə “Qarabağ”a uduzmasaydı, indi 9 xalımız olardı və növbəti mərhələyə çıxmağa bir addım qalardı".

Portuqaliyalı mütəxəssisin sözlərinə görə, həmin məğlubiyyət komandanın işini çətinləşdirib: "Təqvim inanılmaz dərəcədə ağırdır. Həmin məğlubiyyət bizi daha da əlverişsiz vəziyyətə saldı. Buna görə də "Napoli" üzərində qələbə olduqca vacib idi - yoxsa hekayə burada bitəcəkdi”.

Qeyd edək ki, "Benfika" Çempionlar Liqasının əsas mərhələsinin ilk turunda öz meydanında "Qarabağ"a 2:3 hesabı ilə uduzub.