"Neftçi"nin ulduz futbolçusu Vensan Abubakarın Arika Millətlər Kuboku üçün Kamerun yığmasına dəvət edilməməsinin səbəbi bəlli olub.

Prosport.Az "The Sun” nəşrinə istinadla xəbər verir ki, 33 yaşlı hücumçunun milli komandaya çağırılmasına Kamerun Futbol Federasiyasının yeni prezidenti Samuel Eto`o imkan verməyib.

İddiaya görə, Abubakarın Kamerun millisinin bombardiri ola biləcəyini və bu göstəricidə onu geridə qoyacağını nəzərə alan federasiya rəhbəri yığmanın yeni baş məşqçisi David Paquya təcrübəli futbolçuya dəvət göndərməməyi tapşırıb.

Hazırda Eto`o 56 qolla (118 oyunda) milli komandanın ən sərrast hücumçusudur. Abubakar isə yığmada 117 oyuna 45 qol vurub.

Forvardın turnirdən kənarda qalması Kamerunda birmənalı qarşılanmayıb və azarkeşlərin təəccübünə səbəb olub.

Qeyd edək ki, Afrika Millətlər Kuboku bu il dekabrın 21-dən 2026-cı il yanvarın 18-dək Mərakeşdə keçiriləcək.